وماذا بعد.......؟؟؟

السؤال يطرح نفسة
بصراحة السؤال يطرح نفسه دي مش عارف بقولها ليه بس بصراحه بسمعها كتير ونفسي أقولها من زمان المهم خلينا في الموضوع
في يوم من الأيام راحوا ناس للسيده فاطمه رضي الله عنها وأرضاها وقالولها إن المشركين قد وضعوا القاذورات علي رأس أبيكي وهو ساجد حتي إذا ما قام أصبحت القاذورات علي ظهره وجسمه ...ولكن رسول الله صلي الله عليه وسلم...بقي ساجدا ولم ينتهي من سجوده حتي الآن....فراحت السيده فاطمه رضي الله عنها تجري إلي النبي صلي الله عليه وسلم فرفعت القاذورات عن رأسه وأخذت تبكي حينها إنتهي النبي صلي الله عليه وسلم من سجوده وأنهي صلاته ...فوجد السيده فاطمه رضي الله عنها تبكي بشده فمسح دمعها فقالت له
وماذا بعد.......؟
فأجاب الرسول صلي الله عليه وسلم.........................إن الله ناصر أباك
أما كان منا ومن أتباع رسول الله صلي الله عليه وسلم أن يسألوا هذا السؤال.....فما كان منهم إلا أن يوقنو أن الله ناصر نبينا مادمنا نسير علي نهجه وسنته..!؟
أما كانت في قصه يوسف عليه السلام نفس الأسئله عندما وضع في غيابه الجب فيقول
وماذا بعد......؟
فتكون الإجابه ....وجاءت سياره فأرسلو واردهم فأدلي دلوه
أما كان لنسأل السؤال......حينما شروه بثمن بخس دراهم معدوده
فتكون الإجاب .....وقال الذي إشتراه من مصر لإمرأته أكرمي مثواه....ثم قال الله تعالي ...وكذلك مكنا ليوسف في الأرض
أما كان لنا لنسأل السؤال حينما راودته التي هو في بيتها عن نفسة وغلقت الأبواب فنسأل السؤال
وماذا بعد......؟
فتكون الإجابه وشهد شاهد من أهلها ...إلي آخر براءته
أما كان لنا أن نسأل السؤال حينما وضع في السجن فتكون الإجابه
فقال الملك أئتوني به أستخلصه لنفسي
وماذا بعد يوسف.......؟
أم كان من أن نعي عندما وضعنا في نفس الموضع وفصلنا من الجامعات أن نسأل
وماذا بعد........؟
لتكون الإجابه إن الله ناصرنا مادمنا علي نهج الحبيب
حين نمنع من دخول الإمتحانات فليس منا إلا أن نقول
وماذا بعد.......؟
لتكون الإجابه إن الله ناصرنا مادمنا علي نهج الحبيب
إخواني
لا يسعنا في هذا العصر وهذه الإبتلاءات إلا أن نقول وماذا بعد فنجيب علي أنفسنا بقلب ناصع وعقل ناضج متيقن وياقن ...إن الله ناصرنا ما دمنا علي نهج الحبيب

أنا إتفصلت يا جدعااااااااااااااااااااااااان

علي رأي أحد أقاربي المهندسين...يعني لا نافع شاي بلبن ولا نسكافيه ..طيب أشربلهم إيه مخدرااااااااااااااات طبعا كلكو عارفين اللي حصل في الجامعة .....وعارفين إن الإخوان في قنا ليهم وضع خاص في الشغل ...وأتحدي إن حد السنه دي يكون سمع إسم الإخوان في الجامعة...طيب يفصلونا ليه ..طب وحنا عملنا ايه..أنا وحشه ولا ايه...اه لا مؤاخده ده أنا دخلت في الأغنيه...المهم نعمل مظاهرات يفصلونا ...نبطل بردوا يفصلونا ...البنات عملوا إضراب ...إحنا مالنا...ولا لازم يقفلوا محاضر ولا بيقبضوا من هيئه الفصل الدوليه ..ولا عاملين إشتراك سنوي ولا إيه الموضوع بالظبط...الحقيقه بعد كل ده ...بنصح كل شاب وكل فتاه ...وكل طالب وطالبه....وأقول لكم لما هو مش نافع لا شاي بلبن ولا نسكافية....يبقي لازم تشربوا مخدرااااااااااااااااااااااااااااااااااااااااااااااااااااااات (ملحوظه..طب فصل الإخوان بتهمة تحريض البنات علي التظاهر..راجع البوست قبل اللي فات)؟؟
ولسيادتكم جزيل الشكر
تحياتي
هيئة الفصل الدوليه

لسان حالي يردد


بصراحه الواحد مش عارف يعمل ايه في اليوم الواحدج لكن اليوم أنا بصدد (أيام من حياتي)للكاتب المدون ياسر مدني.....يلا نخش في الموضوع ومن غير مقدمات..؟

المشهد الأول(محطه القطار)؟

كنت في ااقاهره ..جاي من المنصوره ورايح الصعيد ومستني القطر والناس بصراحه كتيييييييييييييييييييير ...لا والله ده كتيييييييييييييييييير جـــدا جـــدا جــدا ..ولما دخل القطر وكله بيجري عشان يلحق القطار وأول ما دخل القطر المحطه...الناس وقفت..وانا كمان وقفت أصل القطر كان مليان علي الآخر ...وبصراحه هو كان جاي م المخزن مليان ...أمال الناس اللي في المحطه دول مش الناس اللي مسافره بردوا ولا ايه ...طيب والناس اللي في القطر دول جايين منين ... أمال ايه وفين ومنين ..طيب حتي مفيش مكان نقف فيه ..أمال ايه وحنعمل ايه وحنروح إزاي وكل الناس دي رايحه فين واللي مش عارف يركب حيعمل ايه هاه وبعدين ..طيب والستات والناس الكبيره وكل ده ...والعمل يا جماعه....فلم أجد سوي لسان حالي وهو يردد
حسبي الله ونعم الوكيل

المشهد الثاني(فرن العيش)؟

بما إني عايش في قنا مع شويه طلبه فحنا بنخدم نفسينا بنفسينا ولما جه اليوم اللي أنا حجيب فيه العيش ...رحت فرن ملايين
التاني ...ملاييين

التالت شطب الرابع ...بردو شطب ...شطب الأمر لله أرجع أقف في الأول أو التاني عشان أجيب عيش وخلاص

للأسف شطب شطب
هاه الحمد لله إفتكرت في فرن في وسط البلد بيتأخر ...الحمد لله شغال ...زحمه زحمه مش مشكله المهم ناكل والأمر لله الطاور كلها ساعتين تلاته ونوصل لآخر الطابور ونجيب العيش وبعديها إن شاء الله حروح سالم غانم وحنأكل الناس...المهم الساعه كام دلوقتي إتناشر .....وربع ....ونص ......لسه مزهأتش وربنا مصبرني وواقف في الطابور.....الساعه واحده...وربع ...ونص ...يلا يا جماعه شطبنا مفيش عيش تاني

يالهويييييييييييييييييييييييييييييييييييييييييييييي

يا نهار ابيض بعد كل ده
مكانش في ايدي حاجه غير إني أجد لسان حالي يردد

حسبي الله ونعم الوكيل


المشهد التالت(المواصلات)؟

إنهارده رايح الجامعه وعندي محاضرات كتيييييير وسكاشن من الساعه 8 لحد السعه إتنين محاضرات ...وبعد كده سكاشن ومفيش راحه إلا بعد كل محاضره أو سكشن شويه صغيرين ..المهم مروح بقي وبحلم بالسرير ..والأكل والراحه بعد العناء الطويل ده ...هه ...وطلعت من باب الجامعه....مواصلات ...إيه مفيش مواصلات ...لا حرام...علما بأن كليتي في قنا وهي محافظه مش زي إسكندريه لا تتميز بكثافه سكانيه عاليه..لا ده كتييييييييير ...حرااااااااااااااااااااااااااااااااااااام ...هه الحمد لله في عربيه جيه أهي ....طيب حتشيل مين ولا مين ...فلا أجد إلا لسن حالي يردد حسبي الله ونعم الوكيل



المشهد الرابع(الأمن )؟

يا صبحنا وصبح الملك لله ع الصبح رايح الجامعه وكالعاده الأمن عشان عارفني من الإخوان مش بيقولي هات الكارنيه...بس كان في واحد ماشي معايا إسمه إسماعيل..ألاقيه بيقولي بعد ما سبتني خدوا مني الكارنيه وبهدلوني وقالولي تعالي خد الكارنيه من قائد حرس الكليه....وبعد كده ألاقي الأمن بيجبر المنقبات علي رفعه ومن ترفض تحول شئون قانونيه...وبعد كده أخرج أروح أصلي كل من له لحيه ...هات البطاقه وروح خدها من أمن الدوله ...وهناك هات يا قله أدب....وبعدين هم واخدين راحتهم ليه طيب ما البنت دخلت الجامعه بلبس مسخره ولما راحوا لرئيس الجامعه بهدلهم ...إحنا اللي بنتبهدل وهم الساده واحنا العبيد لا مش ممكن ده كتيييييييييييييييييير


فلم أجد سوي لسان حالي يردد حسبي الله ونعم الوكيل
إخوني المشاهد تستمر والفضايح أكتر والموضوع كبير كبير ...وإستنوا مني باقي المشاهد لأني تعبت بصراحه ولكن حنكمل


وحسبي الله ونعم الوكيل

هيه هيه ..معايا فضيحه جديده

بصراحه أنا مش عارف أبدأ إزاي بس العموم أنا فرحان جدا لاني أول مره أشوف صحوه طلابيه حقيقيه داخل أسوار الجامعه بدون طلاب الإخوان وتكون بالشكل ده المهم إن طلاب الإخوان مش حيعرفه يلموا العدد ده لو عملوا مظاهره في المكان ده.....؟

المهم مستعدين
ردي
إستدي
جو







المكان...جامعه جنوب الوادي...قنا(مش بقولكوا حاجه تفرح)؟
الحادث مظاهره حاشده إحتجاجا علي مشروع الطفطف
(طفطف إيه)(إنت بدأت تخرف ولا إيه )
إستنوا بس ...أنا حشرحلكم..جامعه قنا في مكان ما بعيد عن الجامعه
لا ..إنت شكلك مسطول ولا شارب حاجه

ليه الإحراج ده بقي...بصراحه أنا شربت المر والله...واصبروا لحد ما أخلص كلامي
الجامعه تعتبر في صحرا معزل عن البلد...ثانيا البوابه بتاعه الجامعه بتبعد عن المباني والمدرجات حوالي 800متر وتفضل ماشي انت في وسط الصحرا دي ..وشمس يا معلم ...وإحرق يا سيدي ..عرفتوا ليه الصعايده سمر شويه
اه ...بدأت أفهم الموضوع


أيوه ما انت لازم تفهم والناس لازم تفهم بردوا...والعربيات الميكرباس كانت الأول بتخش لحد المباني وعاملين بوابه جوه قريبه من المباني ماشي يا جماعه ..معايا ولا ايه...طيب المهم ..رئيس الجامعه لغي الكلام ده كله وجاب طفطفي يدخلوا الطلبه وده طبعا بيخلي الطلبه تركب فوق بعضيها صبيان علي بنات ده غير أصلا إنه مبيكفيش وأكتر من تلتين الطلبه بتضطر تمشي المسافه دي في الشمس عشان تلحأ المحاضره وعلي ما يروحوا يكونوا ساحوا طبعا...الطلبه من نفسيها عملت مظاهره إحتجاجيه...وكان العدد حوالي 2000طالب وطالبه..علما بأن مظاهره الإخوان في قنا لا تستطيع حشد هذا العدد..وأجبروا رئيس الجامعه علي النزول ولم يقبلوا حتي مناقشه نائب رئيس الجامعه...صحيح رئيس
الجامعه لف العيال في كلمتين وعطاهم حل أي كلام ...والعيال بدل ما تمشي 800متر حتمشي 300متر في الصحرا والشمس...لكن الجميل في الموقف إيجابيا الطلبه الجديده وتحرك الجامعه دون الإخوان...والصحوه الجيده التي أجبرت رئيس الجامعه علي النزول...والله أكبر ولله الحمد



تحياتي دينامو الإخوان







دعوه وشكر

بدايه أنا أحب أقول جزلك الله خيرا لكل اللي عملي تقدير وزار مدونتي...ثانيا بالنسبه للفوازير ...أنا بصراحه كنت عمال بعد الناس اللي كانت في المنافسه بتاعت فوازير رمضان لقيتهم تلاته بصراحه الواحد تعب فيهم بصراحه لحد ما عديت من أول يوم المشاركات الأولي وخصوصا إنهم كانوا دايما سباقين متفاوتين يعني مش واحد بس اللي كان بيسبق علي طول..لكن في الآخر قررت إن التلاته يتكافؤا وهم زمرده ونور وما علينا...والشهاده لله نور كانت أسبقهم وعشان كده بقولكو إن الباقيين خدوا الأجر سفلقه..بالنيه يعني...وعلي العمو يا رييت التلاته دول يكلموني علي التليفون (0106130119)عشان أعرف حبعتلهم الجوايز علي أنهي عنوان ..وبعد كده هم ممكن يتكلموا علي الجوايز اللي خدوها في مدوناتهم...وجزاك الله خيرا لكل من شارك معنا....وشكر خاص للشاعر وليد الرفشي..حبيب قلبي
ثانيا الدعوه
دعوه لكل المدونين للمشاركه في المدونه الجماعيه ((يلا نفضحهم))وهي عباره عن تجمع المدونين الطامحين في وطن عربي حر دون سجين رأي واحد..مع لجنه سجناء الرأي وحقوق الإنسان..؟
وبالمناسبه لكل مدونين الصعيد يارييت نشترك علشان عايزين نعمل فرع للجنه في الصعيد..ويا رييت بردوا يتصلوا(0106130119) عشان نشوف حنعمل ايه
وجزاكم الله خيرا علي كل حال

يلا نكمل

علي فكره أنا لسه عند وعدي....والجوايز محفوظه زي ما انا إتفقت معاكو..وإنتظروا مني المفاجئه

وكل سنه وانتو طيبيين
تحياتي/دينامو الإخوان

كل سنة وانتوا كلكوا كدة طيبين

اول حاجة قبل ما اعيد عليكوا اقدملكوا اكبر اعتذار بالنيابة عن اخويا وحبيب قلبي ياسر باشا الدينمو

أصل الحكاية شكلها كدة كبيرة اوي

الأول سفر لأسوان ويتصل بية : ياعم معنديش نت وعايز أنزل المسابقة

وبعدين رجع علطول علي أحلي عشر ايام في السنة أيام الأعتكاف وبعدين العيد يعني من الأخر كدة ربنا يعينوا علي اللي هو فيه

المهم كدة يارب يكون كل واحد شايل حاجة في قلبه تبقي خلاص كدة

هاااااااا صافي يالبن .......


بعد الكلام الكتير دة أعيد عليكوا وأبلغكوا أكبر سلام من أخوكوا ياسر وبيقلكوا كل سنة وانتوا يارب فرحنيين وبالخير متنعميين وبعيد عن حبايبنا الوحشيين عايشين

وبالنسبة للمسابقة الجميلة الشعرية الرمضانية بإذن الله حيكون الإعلان عن الفئز فيها بعد كام يوم كدة

يلا كفاية كدة وسلاموا عليكوا









جزاك الله خير..ويارب كتر من الدعوات

مش حنطول عليكو وحنخش في الموضوع
الفقره الأولي ...يلا نحسن أخلاقنا....!؟
إيديك في إيدنا نبقي قوه
بالمحبه بالإخوه
دحنا زي جسم واحد
هو ده هدي النبوه
خلق اليلادي عالإثم مش مطلوب
لكنه شئ مطلوب عالبر والتقوي
الفقره التانيه....من هو...!؟
ضئيل الجسم لكنه بدينه أشد
وجهر بسوره الرحمن بقوه صحوته يشهد
رسول الله يعلمنا في حديث مشهور
بإنه كفء في القرآن وحافظه بجد
واسمه مره تلقي في اخرته مسعود
ومره يكون في اخره إبن أم العبد
تحياتي/الدينامو

أنا آسف علي التأخي ...لكن والله كنت تعبان جدا

أنا آسف جد ا يا جماعه علي التأخير لكن والله الواحد مطحون سواء في شغله أو مع الإخوان عشان بنحضر للإعتكاف..والله إمبارح رجعت بعد لف كتير وكنت تعبان جدا فمقدرتش أنزل حاجه اليوم ده..لإني كنت حروح لأستاذ وليد الأول كمان لإنه مكنشي سايب حاجه في اليوم ده...لكن علي العموم يلا نكمل...!؟
الفقره الأولي ....يلا نحسن أخلاقنا....!؟
مظبوط وراسي تحب صاحبه وتعاشره
وبسيد الاخلاق يزين أحواله وأمره
خلق وياما اتقال علي صاحبه
لو مره راح يغضب....؟
يبقي إتقي شره
الفقره التانيه.....من هو...؟؟
المسأله مش ا لون ولا جاه
الرك ع اللي في قلبنا جوه
ممكن يكون اسود وعبد فقير
لكن مع المصطفي قام اسس الدعوه
وأميه عرضه بقليل واما اشتراه ابو بكر
علم أميه إن العبد ده ثروه
يالا نفتكروه في اليوم خمس مرات
مع كل وقت اذان بيجدد الصحوه
تحياتي/دينامو الإخوان

يارييت كل واحد..قبل ما يجاوب ينصح نصيحه

يقول النبي (صلي الله عليه وسلم)الدين النصيحه..قلنا لمن يا رسول الله ..قال (صلي الله عليه وسلم)لله ورسوله وللمؤمنين وأئمه المسلمين وعامتهم....فيا رييت.عشان أنا مش لاقي نصيحه أقولها ..كل واحد ينصحنا عشان مفيش حد إمبارح نصحنا غي واحده بس فيا رييت كلكم تصحونا...وجزاكم الله خيرا..؟
الفقره الأولي ....يلا نحسن أخلاقنا...!؟
ربنا بيحبك علشان
مسلم وصحيح ميه الميه
وف عملك ترضي الرحمن
وتجيب الدرجه النهائيه
بتراعي في الصنعه ضميرك
وتقول حب الله أمنيه
الفقره الثانيه...من هو...!؟
غيرته علي ابن أخوه هزت كيان قلبه
ويوم من بعد يوم زاد للنبي حبه
فارس وهاجر وبادربالجهاد يوم بدر
وكان في غزوه أحد درب الجهاد دربه
والوحشي لما إتأمر من هند يقضي عليه
مات شهيد دعوته .يرحم أسد ربه
كتبها وليد الرفشي
تحياتي دينامو الإخوان
أنا مش عارف أقول ايه النهارده بس ممكن أعمل حاجه تانيه يارييت كل واحد قبل ما يجاوب النهارده يكتب نصيحه ليه ولإخوانه في رمضان..وربنا يتقبل ولا تنسوا تجديد النيه
الفقره الأولي...يلا نحسن أخلاقنا....!؟
بدينا يكون خلق اليلادي
ولأمتنا نطلبوا م الهادي
وبيه ...حنرفع راسنا فوق الكل
ونعلن (دينا هو الحل)؟
ونرفض م الأعادي الذل
ونقرأ أسماء الله الحسني
في ثامن إسم نلاقي الحل
الفقره الثانيه...من هو...!؟
قريب م الرسول جدا
حماه..وصاحبه ...ورأيه ميزان
وياما رأيه يتأيد
بنور الوحي والقرآن
في غيرة قليه علي أهله
حديث مشهور عن العدنان
وليه رهبه في قلوب الناس
ودره إيده شاهد كمان
فاروق في الحق ميهموش
لا فرس وروم ولا طغيان
كتبها الشاعر/ وليد الرفشي
تحياتي /دينامو الإخوان

إنها أيام المغفره

بفكر حضراتكم إن إحنا دلوقتي في أيام المغفره ويا رييت تكتروا من داعئكم وتدعولي (اللهم إرزقنا الرحمه والغفران..والعتق من النيران)وجزاكم الله خيرا....ويلا بينا نكمل
الفقره الأولي ...يلا نحسن أخلاقنا....!؟
أمتنا يا خير أمه أخرجت للوجود
لأمرها ونهيها وخيرها في القلوب موجود
تعالوا ننول من الخير نصيبنا
لو إحنا حنأدر ننوله بإيدينا
يا إما بلسانا وحكمه كلامنا
يا إما بقلوبنا بقدر إيمانا!!؟
الفقره الثانيه....من هو؟
أساور كسري مين أده ...حيلبسها
يا بخت اللي النبي وعده ..وحيلبسها
وتيجي للفاروق عهده .ينادي عليه ويلبسها
وكل الناس بيشاهدوه..وهو بيلبسها
كتبها الشاعر/وليد الرفشي
مع تحياتي/دينامو الإخوان

إلي أصحاب الهمم العاليه

بصراحه أنا عايز أقول حاجه مهمه جدا...بالنسبه للمساجد في أول رمصان بلاقي المسجد مليان علي اخره لأ وسعات بنفرش بره المسجد كمان.. لكن دلوقتي بنكمل تلات صفوف بالعافيه..وده لان الناس في الاول بيبقي عندها همه عاليه وحماسه لكن بعد كده بيخستعوا ..ويمكن هو ده اللي بيحصل برده معانا...أول رمصان ألاقي الناس داخله تعلق بالكوم..لكن بعد كده عدد المشاركين بيقل جدا ...لكن علي العموم ..أنا حكمل بأصحاب الهمم العاليه وأنا معا هم علي وعدي بالجوايز....وجزاكم الله خيرا
الفقره الأولي...يلا نحسن أخلاقنا...!؟
إحنا بيهم إحنا ليهم إحنا من غيرهم سراب
وإتأمرنا نطيع أمورهم مهما كانت من صعاب
طاعه طول ما الامر طاعه لإلهنا يا شباب
يالا نتقلب في جنه تحت رجليهم تلالي
يالا نهرب من مجرد (إف)أو صوت يبقي عالي
يالا نطلب من دعائهم .ده دعائهم والله غالي
يبقي ايه خلق اليلادي؟قولوا يا اهل المعالي
الفقره الثانيه....من هو؟
سبحانه ربي برحمته يهدي النفوس
وناس تآمن بعد ما كانوا لصوص
سيدنا
كلمه التوحيد ...قالها وايمانه شديد
مقدرش صوت الحق جواه يكون محبوس
حيعيش وحده...ويموت وحده..ويبعث وحده
ده كان كلام النبي في الحديث(منصوص)؟
كتبهاالشاعر / وليد الرفشي
مع تحياتي/ دينامو الإخوان

هاه ...يلا نكمل

أنا مش عارف أقول إيه بس للأٍسفإ أنا مضطر أقفل مجال حل الفزوره الأولي وهرد لك لكل اللي ملحأوهاش.. وأدامهم الفرصه يكملوا لان اكيد في ناس مش حتحل التلاتين كلهم..وبالنسبه للناس اللي لحأت...أحب أقولهم شدوا حيلكم وربنا يجازيكم الثواب قبل الجايزه الدنياويه..ولا تنسوا تجديد النيه قبل الحل
الفقره الأولي..يلا نحسن أخلاقنا...!!؟

وحده وحده هو مش عالأرض غيرك
ماشي عالناس الغلابه فوقها فارد ليه جناحك
يعني إن كنت إبن آدم احنا أولاده كمان
آه يا خوفي لو بفعلك تبقي قلدت الشيطان
يا صاحبي دوه خلق قالت عليه السنه
لو كان في القلب ذره راح تحرم الجنه
وإن كنت معرفتوش إقرأ سوره لقمان
في وصيته لإبنه ...راح تفهم المعني
الفقره التانيه....من هو؟؟؟
قائد حرب مش عادي
ومالهوش حل في التخطيط
مياه النهر والوادي
عارفه إن عقله حويط
ونصر المولي مكتوبله في كل ميدان
ده سيف الله ضد الكسر والتفتيت
كتبها الشاعر/وليد الرفشي
مع تحيات /دينامو الإخوان

آسف للتأخير المهم نكمل تلاتين

جزاكم الله خيرا لكل من شارك
أما بانسبه للأخ اللي عايز ياخد الفوازي انا إستأذنتلك الشاعر ووافق ومفيش مانع

الفقره الاولي...يلا نحسن أخلاقنا...!؟
يا مسلمين إسمعوا لنبيكم المختار
علمنا إن الإيمان أفعال وما هو هزار
مفيش إيمان إن كان خلق اليلادي إنعدم
وكلام رسول الله للمسلمين إنذار
وإن عشنا بيه حنكون أولئك هم المفلحون
وإن كنتوا مش عارفين روحوا إسألوا الأنصار
الفقره التانيه...من هو....!؟
آيه من كتاب الله خلدت ذكري وما بننساه
فيه النبي إتعاتب وأقرأ عتاب الله
عبس وتولي أن جاءه الأعمي
وما يدريك لعله يزكي
مع تحيات
الشاعر/وليد الرفشي
ياسر مدني..دينامو الإخوان

ده في جوايز يا جدعان

السلام عليكم ورحمه الله وبركاته..إزيكم وإن شاء الله تكونوابخير ..وإن شاء الله تكونوا بتستفيدوا من رمضان واللهم تقبل منا صالح الأعمال..وبفكركم بردوه إن فيه جوايز جامده وحتعجبوا إن شاء الله وحتوصل لحد بيوتكم بالطرود إن شاء الله ..إلا لو كان الفائز من إسكندريه فأنا حرحلوا بنفسي ويارب يكون من إسكندريه عشان يوفر تمن الطرد..وعلي العموم اللي لسه منتظمين في الحل وإجاباتهم صحيحه لحد دلوقتي هم تلاته..الأخت زمرده..والأخت نور..وما علينا. وفي غيرهم بس لحد دلوقتي هم دول المتقدمين وعلي فكره الفوازير اللي فاتت لسه ممكن تجاوبوا عليها وخدوا بالكو إن أول فزوره حتتشال كمان تلات ايام ويارب تلحأوا..!!؟
الفقره الأولي...يلا نحسن أخلاقنا...!؟؟
يا أول عشره من رمضـان
تـقـدم مـعـنـي للإنـســـــان
خلق مطلوب ما بين بعضنا
كمان مطلوب مع الحيـــوان
وبيه البركه م الســمــــوات
تحــل عـلـيـنا بـالبـركــــات
ولــــو مـــيـــن مــات ..!؟
بـنــطــلــبهاله م المنـــــــان
الفقره الثانيه...من هو.!؟
قرب وشوف طلعته واسمع كلامه العزب
أول سفير... دولته..دين السلام والحرب
حامل لواءه في أحد بكفوفــه والدراعيــــن
يتحدي سيف العدو رغم الجراح والضرب
دي الـرايــه روحــه ولــو بـإيديه لغيرسها
بعد ما يحفر لها جوه في صمـــام الـقـلــب
مع تحيات
الشاعر/وليد الرفشي
ياسر مدني

أنا اسف بس ممكن نكمل

في البدايه ببدأ بإعتذار شديد جدا جدا عن الفزوره بتاعه إمبارح..وذلك نظرا لشده إنشغال المؤلف ..وإن شاء الله مـش حتتكرر تاني
وعلي العموم بالنسبه للناس إللي عايزه تلحق التعليقات الأولي أنا غالبا بنشر البوست قبل الفجر بساعه أو ساعتين..وياااارب الناس كلها تكسب واللي ميكسبشي جوايز الفزوره يكسب حاجه تانيه بس الرك عـــلي النيه....وبالله عليكم لا تنسوا تجديد النيه
الفقره الأولي....يلا نحسن أخلاقنا...!؟؟
خلق وقدره عظيم ومحتاجينله صحيح
في الوعد والكلمه واللجنه والتصحيح
نضيعوا لو حيضيع من الشرا والبيع
والطرح والتجميع والجامعه والترشيح
أهل المناصب أصلهم لو كانوا عارفينه
كانت الخزاين إتملت ولشعبنا المفاتيح
لكن مفيش فايده ...مات أبو عبيده
يارب عوضنا ...ده دعاءنا في التراويح
الفقره التانيه...من هو..؟؟
تحبه من إسمه والحب للأنصار
في قلوبنا شايلينه ..حب وإخاء وإيثار
وداره كانت للرسول الدار
اللي نزل فيها من بعد ما هاجر
والمولي بارك في داره ببركه المختار
مع تحيات
الشــاعــر/ولــيـد الـرفشــي
ياسر مدني..دينامو الإخوان

الفزوره الخمسه..خش وقول ماشاء الله

جزاكم الله خيرا...وبذكر حضراتكم مره تانيه يا رييت تجاوبوا علي الفوازير اللي فاتت كلها عشان فرصتكم في الفوز تزيد وربنا يكرم ..وبفكركم بردوا تاني إن كل فزوره ممكن تجاوب عليها خلال عشر أيام..وكل سنه وحضراتكم طيبين ..واللهم تقبل منا ومنكم
الفقره الأولي ..يلا نحسن أخلاقنا...!!؟
صــــحابــي راح لـلـنبـي وقالـه وصيي
رد الـنبـي وحـذره مـن خـلــق مذمـــوم
ولـمــا قـال زدنــي فـي الأولــي والتانيه
عـــاد النبـــي تحذيــــره يـأكــد الـمـعلوم
خـلــق ولـو جـالـك لـــو انت واقف أعـد
ولـو انت قاعد حضر مدد في وضع النوم
ده نــــــار وطفيهــا بالسكــــــــوت فـورا
والــحـقــها بـوضوءك قبل ما نارها تزيــد
الفقره الثانيه ...من هو ....!!؟
مــقـــام عــالـــي وجــاه في الاوس وفـ يثرب
واسلم لما شاف الخير ونور الحق من مصعب
ومــيـــن أده مــلايـكـــــة ربــنـــــــا نــــزلـت
تــســـمـــع صوتـــــه فـــــي الـقـرآن وتتقرب
مع تحيات
الشاعر وليد الرفشي
ياسر مدني
جزاكم الله خيرا لكل من علق سواء بالنقد أو بغير كده ...ونسأل الله أن يتقبل
وأحب أفكركم إن إنهارده رابع فزوره يعني يا ريت تجاوبوا علي التلاته إللي فاتو..وخصوصا إن أولويه الفوز بأكتر الإجاباب يعني غالبا حتبقي تلاتين إجابه ..وطبعا في أولويه للي يجاوب اسرع وفي أولويه للإجابات الصحيحه..وهمه دول تلات أولويات للفوز ..؟؟
وجزاكم الله خيرا
الفقره الأولي ..يلا نحسن أخلاقنا...!!؟
لو انـت عـايــز النجا من كل سوء أو شر
خـلـق الـيـلادي خـلـق يهدي لكل الـبــــــر
وآخـرتـه جـنـه ونـعـيـم وحـاجـه تـســــر
لـو يـبـقي مـع ربنــا فـي التوبه يغفر لنـا
فـــيه النـجا والـهـنــا فــــي دنـيـتك والقبر
ده بيه نبينا إتوصف يشهد له أهل الكــفـــر
الفقره الثانيه...من هو...!!؟
عـــامـــــــر وقـــلـبه بـالايـمــان عــامـــــر
عـالــم وعـلــّم كـــان صـحـيـح شـاطـــــــر
قـالـهـا لـخـالــد انـا وانـت خـوات فـــي الله
جـنـدي وقـائــد لا بـنـفـرط ولا نـكـابــــــر
فتح دمشق وحــلــب وكـل ارض الـشـــام
والدنيا كانت في عينه اصغر من الصاغر
مات بالطاعـون وادفن والامة مش نسياه
عمر ( الامين) ما اتنسي والقلب ليه فاكر
مع تحيات
الشاعر وليد الرفشي
ياسر مدني

خلق وصحابي ..كلاكيت تالت مره

لسه الفرصه أدامك ..كل سؤال حيتحط عشر أيام
جزاكم الله خيرا علي الإخوه إللي جاوبوا..بس يا ريت كل أخ يجاوب علي الأسئله من أولها عشان يكون من الفايزين بإذن الله..والأسئله يوميه ..والفائز مش بس بأولويه الأسبق في الإجابه لكن كمان الإجابه الصح والكامله..يعني تلاتين يـــــــــــــــــــوم
الفقره الأولي ..يلا نحسن أخلاقنا..!!؟؟
خلــق اللـيلــه دي خـلـق كـلـنـــا إشتقناله
في عصر الموضه والإسترتش وأمثاله
واللي ما يبقي خلق الليلــه من حـــالـــــه
في طريق سخط ربنا يعـمـل مــا بدالــه
خـلـق ومـنـزلـتــه شعبـــه مـــن الإيمان
بيه الملايكه تتوصف لما تشوف عثمان
خلق ولو ينتشر بين شعبنـــــا الـغلـبـــان
يسهل غض البصر ويحبنا الرحمـــــــن
الفقره التانيه...من هو؟؟؟
شخصية من عهد النبي مش بس صحابية ؟!!
ما شاء الله مين امها شريكة ووفية
والاب ده للناس هداية وهديه
محسن وزينب وام كلثوم كل دول
اولادها زينة الشباب في الجنة ذرية
افضل نساء العالمين اربعة وعدّوا
الزهرة دي وامها
والسيدة مريم .. والسيدة اسيا
بعد وفاة النبي 6 شهور عدّوا
راحت وراه ودعت الصحب والدنيا
كانت لسيدنا النبي رحمة ومحبة وهبة
حبيبتي كلمة يا ناس علي حبها شوية
لا تنسوا تجاوبوا علي كل الإجابه اللي فاتت ...وربنا يوفق الجميع ..والأولويه في الفوز ..والأسبقيه ..والإجابه الصحيحه..وتكون التلاتين إجابه..؟؟
مع تحيات
الشاعر وليد الرفشي
وياسر مدني
لكل من ساءه الحظ ومجاوبشي أدامك الفرصه لسه تحاوب علي السؤال وكل سؤال إجابته تتحط في عشر أيام
الفقره الأولي...يلا نحسن أخلاقنا
نــعمــة جلـيـلـة مـن نـعم ربـنـــا
يا ريت نصونها من الحرام كلنا
عـلـشـان قـلـوبنا بحلاوه الإيمان
تعمر ......تـنور لما تطسع ربنا
خلق إتأمرنــا بيه في سوره النور
لما نبينا إتأمـر يـأمرنــا ويقولنـا
خلق ولو نتركة تكترسهام إبليس
ونعيش يهددنا خطر بريد الزنــا
الفقرة الثانية ....من هو ؟؟؟
قالوا الرجول صفـــة .. قلنــا الـكـلام مظـبـوط
مرأة ولكن بطل .. تــتــصــدي لـلطـــاغــــوت
رقــة وانـوثــة صـحـيح .. ده شىء مفهش كلام
لكن في ساعة الصعاب كان ليها جولة وصوت
دخـلـت فـــــي غــــــزوة احد تـحـمـي رسـول الله
وتصــحصــح اللــي غــفــل وتحـــارب الجبـروت
ويمــيـن شــمـــال بــتــصــد عن الرســــــول الأذي
تدفـــــــع .. تـــدافع .. تنافح .. واللي يشوط حتشوط
وامــــــا دراعــهـــا اتــجـــرح قــالــت فدا المصطفي
جرحي الكبير ده يهون ويعيـــــش ولو حــنمـــــوت
شعارهــا كـــان اعـــمـــــال بـــيــقول لكــل الـــنــاس
اللي حــيـــأزي النبـــــي من ســـيفي مــــــش حيفوت
مع تحيات وليد الرفشي لكل الزوار بالفوز
وتحياتي ياسر مدني

كلاكيت أول ليله

السلام عليكم ورحمة الله وبركاتة
في البدايه بشكر أخويا وحبيبي الأخ مصطفي سعد اللي كتب البوست اللي فات في فتره غيابي وجزاه الله خيرا
ثانيا أحب أدخل في الموضوع علي طول
لكل أصحاب المدونات ..فوازير رمضان .... عبارة عن خلق وشخصيه ..ويلا نحسن أخلاقنا ..ويلا نعرف تارخنا
الفزوره من فقرتين الفقره الأولي ..إسمها يلا نحسن أخلاقنا
والفقره التانيه من هو؟؟
والإجابه حتكون في التعليقات ..والأولويه لمن يكتب أولا وصحيحا وعدد إجابات أكتر علي مدار الشهر....وفي العيد حنشر الإجابة بإذن اله وإسم الفايز
وأنا اسف إني طولت ...ونخش ع المسابقة
مقمة الشاعر وليد الرفشي
حذروا فذروا لو حتفكروا حتلاقوا الحل
وان قلت الحل متنساش "سيدي وسيد الكل "
اكمني أدبنا مع الاصحاب من اصل الدين
وسيرتهم عطر يعطر ليلنا بورد وفل
الفقرة الأولي ..يلا نـــــحــــسـن أخلاقنـــــــــا.....؟؟
خلق حميد وكـــــــــــريم وله فضلــــه
وبيحب الصيام أصل الصيام شــطرة
خـلـق ولو تـتحـلي بـيـة تكون محبوب
وتخل الجنة من غير حساب محسوب
في بدايـه الصدمة خلـق حميد مطلوب
ما بننسي لو نحكية سيدنا النبي ايوب
الفقرة الثانية ..من هو؟؟؟
عـبـد الله ماشــــــــــــــاالله مكــانــــة واموال ومهابــــــــة
معروف وده كان مألـــــــوف بيحـــبوا أغنـيـا وغـلاـــبة
عارفك مين انت وفين ومنين ولذلك سموه ( نسّابــــــتة )؟
صادق وصدوق ورقيق وخلوق واسد بتخاف منه ديــابـــة
واهو نال البشري وكان م العشرة وكانله في الهجرة اصابة
لو مش عـارفــين هــو تــاني اتنين .. اول من رفع السبابة
يشهد لله ورســول لله وخـليــفتــه الاول يا صـــــــحابـــــة
مع تحيات الشاعر وليد الرفشي
في البداية وقبل ما اكتب البوست ده  أحب بس أبلغكم اعتذار اخوكم ياسر الدينمو عن تأخيره
والبوست ده  يعتبر اول محاولة تدوينية مني مشاركة لأخويا ياسر  
أنا عارف إنه مش قد كدة بس معلش استحملوني  شوية

كل عام وأنتم بخير

كل عام وأنتم إلي الله أقرب

كل عام وأنتم علي طاعته أدوم ومن الجنة أقرب

رمضان جانا وفرحنا بيه ويارب يكمل فرحتنا وفرحتكم



رمضان شهر الصيام والقيام شهر الرحمة والغفران





يلا بينا نصوموا رمضان متضحكوش كدة

نصوموا رمضان بجد يعني نغض بصرنا ونحفظ لسانا يعني الجوارح كلها تصوم معانا

والجائزة



وعايزين كمان نقوم الليل ونصلي التراويح


وكمان في جائزة



وبعد الخير ده كله مش عايزين ننسي أحلي فوازير ممكن تشارك فيها

فوازير رمضان من غير معاصي ولا نيللي ولا حتي شريهان

دي فوازير عن الأخلاق والصحابة فوازير ننشط بيها نفسيتنا

فوازير شعرية جميلة ومن شاعر الشباب

الشاعر
وليد الرافشي



انتظرونا في رمضان

أخوكم / مصطفي سعد

بمناسبة شهر رمضان ....إعتقلوا كوادر الإخوان




والله وبصراحة أنا مش عارف أقول إيه....أنا كنت في الصعيد اليومين دول عشان بصيف ومحدش يقول نعم بإستغراب!!!؟؟؟ أصل أنا صحيح إسكندراني بس أصلي من الصعيد ..وأبويه كان عايز يزور بلده وأنا قلت أروح معاه وخصوصا إنه رايح ورجله مكسوره...المهم خلينا في موضوعنا .... وانتواعارفين طبعا إن الحمد لله الأخبار في الصعيد سهلة جدا إنك تعرفها ..عشان كده عرفت النهارده بالتليفون من أخويا الكبير وبالمناسبة إنهارده 20/8 ....!!؟؟؟
المهم عرفت إن في من كام يوم كام كادر من كوادر الإحوان قال إيه ...!!إتقبض عليهم وكل سنه وانتم طيبين و ..وإزيكم إزيكم أنا جاي أرمضن عندكم.....شوف إزاي ؟؟؟



علي العموم مش هية دي المشكله المشكله حاجه تانيه...أنا كنت بفكر فيها كتير بصراحة....بما إن النظام عايز يتخلص من الإخوان لازم يضرب في العمود ..ولكنه بجهلة أنا شايف إنه معرفشي يضرب في العمود بجد والله عارفين ليه لإن مش هم دول عمود الإخوان ...وواضح إن زيهم زي غيرهم لما فكروا إن إغتيال البنا يقضي علي الإخوان ودول بردو شايفين إن القبض علي الكوادر يقضي علي الإخوان ...ولكن هيهات هيهات...ده عمودنا السنة والقرآن...



كذلك لابد للبناء من حجر ............ يصيبة أو يصيب الطين أردانا



وده لإن أجهزة النظام الفاشلة حتي في محاربة طوائف الإصلاح تتميز بالغباء والبلة وأظن واضح إنهم مبيتعلموش ...وعلي العموم إحنا إللي لازم نعرف إن إحنا مش حنخش الجنة ببلاش ...وإللي متقبضشي عليه ربنا حيبتلية بحاجه تانية غير السجن ..والسجن للجدعان ..والصبر من عند الشجعان ..وحنفرح ولكن عشان رمضان وفرحتنا طاعة للرحمن ..إيديكم في إيدنا نجدد عهودنا ده إحنا في سفينة وموجها علينا عالي وخطير ... وإنما يوف الصابرون أجرهم بغير حساب ..واللي بيحصل ده كله بدايه النصر ..وكل سنه وانتم طيبين..واللهم بلغنا رمضان
وبشر الصابرين






آه صحيح بالمناسبة إنتظروا مني فوازير رمضان للمدونين فقط والجايزه محفوظة والفوازير يومية



خلق وصحاب
لأحد الشعراء الكبار





تاج دستوري مني لكل الناس


بدايه أنا اسف علي تاخيري عن التدوين لفتره وده إعتذار لربي وتقصيري في الجانب الذ طالما عاهدت الله علي أن يكون جزء من دعوتي

ثانيا التاج ده نفسي كل الناس ترد عليه حتي الناس اللي مش حطلب منهم يردوا وبالله عليكو بالله عليكو.... يلا نجدد النيه...شكرا علي التجديد..هاه... يلا بين؟؟؟؟؟ا...يلا بينا

هل تحرص بصدق علي تجديد النيه قبل الدخول علي النت؟؟؟

أنا بصراحه أحيانا بنسي وأحيانا بجدد النيه في النص كده ..بس والله بحاول أجتهد في علي قدر إستطاعتي في تجديد النيه ويارب يا الله سامحني علي التقصير

ما رأيك في جريده الدستور؟؟؟

أنا شخصيا شايف إنها مش حلوه وهو ده إللي في قلبي..لكنها أحلي الوحشين وخصوصا بعدما سائت ظروف الصحافه ولم يعد هناك جريده صاحبه رساله حقيقه ربانيه...فهل تشعر فعلا إن المسئولين في جريده الدستور ربانيون

ما رأيك في شويه المدونات دي..(أنا إخوان..إبن أخ..حلم الحريه..مش حاسكت..جهاد المصري)؟؟

بالنسبه للأولي ..أحب أوضح إني مش بخشها زي الأول لكن رأيي فيها إنها ممتازه بس بنسبه 89%وده لأنه مبقاش زي الأول في دايره إنتشاره تعامله مع الناسوالمدونين ..وهنا السؤال..هل انت راضي عن شغلك يا أخ عبد المنعم أو السؤال بطريقه أوضح ...أنهي أريحلك قبل السجن ولا بعده؟؟

وبالنسبه للتانيه..أنا بحب كل أخ وكل أبناؤهم ولذلك أنا بفضل أدخل عنده بس مقرأشي حاجه

بالنسبه للمدونتين التانيين ..أنا بحب حلم الحريه جدا وبحب صاحب المدونه (مش حاسكت)ومقدرشي أقول أكتر من كده عشان هم بصراحه ومن غير كدب ولاد عمتي

هل بعد قراءتك للإجابتين إللي فاتوا ..حسيت إن أنا أيه؟؟ولا تنسي الصدق.؟

أنا بصراحه حاسس إن ...ولا خليها بظروفها

هل تثق في جريده الدستور؟؟؟

بصراحه جريده الدستور عندها مصادر مش عند حد للبحث عن الأخبار ..ولكن...ده ميخلنيش أثق فيها الثقه الكامله

أنا بحبكو في الله..فهل تحبونني...ولا تنسوا الصدق؟؟

خلي إجابه السؤال ده ليكوا

هل تعمل في السياسه والعمل العام أكثر من الربانيات والروحانيات؟؟؟

بصراحه أنا بفضل الروحانيات ..بمعني لو عندي وقت فاضي أقرا قران بدل النت ولو عندي وقت غيره أصلي لله وبحب قيام اليل وبحب الحب جدا وخصوصا لو كان لله..ولا تنسوني من صالح دعائكم

هل الدستور تحب الإخوان,,ولا بتستغلها؟؟

الدستور في رأيي تلجأ إلي الإخوان لأنهم الأقوي في الشارع..يعني ليه عبد المنعم يحرر صفحه ..وليه الدكتور عصام يكتب فيها مقال إسبوعي وميظهروش غير بعد ما إتقفلت جرايد الإخوان والمواليه ليها من قبل..والإخوان بالنسبه للدستور من وجهه نظري زبون لقطه ..إحنا محتاجين ننشر فكرنا وهم محتاجين لقوتنا وشعبيتنا ولكن المنفعه الحديه ليهم أكيد أكبر لأننا حاجه كبيره بالنسبه له وهم مجرد وسيله سهل الإستغناء عنها

أنا حاسس إن انا خرفت أو رغيت كتير علي العموم أنا حمرر اللتاج علي كده وإعذروني لإني عايز الناس كلها ترد علي التاج


جهاد المصري&حلم الحريه&بنت الجنوب&إبن أخ&مش كاسكت&أسماء العريان&فاروتا المصري&عيون ضيقه&كلام غي الممنوع& شباب روش طحن&عاشقه الوطن&إمام الجيل&عصفور المدينه&مشروع بطل


كما أرسل هذا التاج إلي كل مدون يحب الله والوطن ويعمل من أجل رساله ربانيه

حلم الحريه(الجزء الثاني)..مصري جدا






حينما كان يصلي في المسجد الأقصي وراي الطمأنينه في قلبه وكان البلاد يسودها الامن والأمان (لا فيها يهود ولا يحزنون) ..وكان ينعم براحه وجد الباب يطرق بشده وعلت الصيحات من خارج الباب وسمع أحدهم يقول (إفتح لحسن نكسر الباب ) فإذا بموظف الضرائبيطالبه بدفع ضريبه الحلم الكذاب ..............والله هيهات هيهات أن يكون حلما كذابا ...فسنعود وربي سنعود ....وهذه هي الأمنيه الثانيه التي تمناها شاعرنا الذي نسير علي خطاه الشاعر وليد الرفشي وهاه نحن ةنضع بين هذه السويطرات الجزء الثاني من ملحنه الشباب (حلم الحريه).فإلي هناك



( حلم الحريه ..(الجزء الثاني



كلماته صنعت رجلات الوطن



همساته داوت جراحات الزمن



شيخي الجليل



صانع الحلم الجميل



ومربي الأجيال جيلا بعد جيل



أوصاني شيخي مره وقد كنت صغيرا لم أزل ......وقال لي



أي بني لا ترتكن)



وأبذل لدينك والوطن



واصبر علي كل المحن



لا ترتك لا ترتكن).!!؟



من يومها والحلم راود مهجتي وفؤادي



إن كان نصر الحق آت فمن بلادي ..مصر



مصر التي مدح الحبيب جنودها



مصر التي مازال فيها الخير..شعبا وارضا والشباب الطاهر



زلزالها رعد يهز عدونا ...ويد تدمر ما ييد ويمكر



هي صحوه....قامت لتعلن أننا بلد أبي لا يهون وبشعبه لا يغدر



حلمي ولست التائه الحائر



من مصر تنطلق البشائر



أنها قهرت يهود



وأراحت الدنيا من الرجس الكئود



وأعادت القدس الشريف ومسجدي المفقود



ونبوئه العدنان فيها والجنود



تحي الأمل ..وتقرب الموعود



يا ليتنا من مصرنا نعود وبإسلامنا نسود



مصر العروبه



مصر الوطن...مصر الوطن






ها قد إنتهت الكلمات الصغيره التي أقسم انها خرجت من أعماق أعماق القلوب..ولكن....؟؟؟



هل يا تري سنسود ..ونعود...ونقود بإسلامنا....والله انا علي يقين من سياده الاسلام مادمت أقسمت علي أن أعيش وأموت علي فكري ..ولكن هل نعيش حتي نلقي هذه اللحظات ...فاللهم لا تحرمنا لذه النصر أو أجر الشهاده ...اللهم ارزقنا النصر والسياده ...أو الموت والشهاده...اللهم امين

صحيح أيام إمتحانا وكنت عايز ...بس انت أولي

والله في ايام الإمتحانات انا مش بعد علي النت كتييييييييير ولما بعد علي النت كنت أفضل إني انزل الجزء التاني من حلم الحريه للأستاذ وليد الرفشي بس بعد الكلمتين اللي قرأتهم في اخر التاج اللي بعتهولي إمام الجيل ..قلت انت أولي برده وبسم الله إستعنا علي الشقه في سبيل الله


أنت مين؟

ايه يا عمنا انت مش واخد بالك ولا ايه؟؟؟ياسر مدني ومن اسكندريه ..انا عارف ان انت مش عايز الإجابه دي بس بصراحه انت جيت علي الجرح والله
..لأنك إن سألت القوم عني من أنا ..من انا؟؟.انا مؤمن ساعيش دوما مؤمنا فليعلم الفجار اني ها هنا...لن انحني ..لن انثني ..او أركنا
ده لو سألت القوم أما الصراحه
أنا من علمت المذنب العاصي الذي عظمت خطاياه فجاءك يهرع
كم بت ليلي كله متثاقلا وذوو التقي حولي قيام ركع
أنا إن عصيت فذاك من نقصي ومن غير الإله له الكمالالأرفع

مش بقولك انت جيت علي الجرح ...علي العموم شكرا علي السؤال اللي يوجع ده

مين اكتر ست شخصيات بتحبهم؟

بصراحه والله ومش بكذب
1- أمي ربنا يديها الصحه
2-أبويا ربنا يخليهولي
3-أختي الكبيره ربنا يرزقها الزوج الصالح
4-أخويا أحمد
5-أخويا محمد
6-أخويا عبد الرحمن ومصطفي الصغيرين
.....وبصراحه كده هم كده سته بس انا لازم أقول إني بحب الأستاذ وليد الرفشي جدا جدا جدا


أنت سعيد؟

الحمد لله ..صحيح في شويه مشاكل ..وشويه أحلا م..بس الحمد لله علي نعمه الإسلام وكفي بها نعمه .. ..والحمد لله علي نعمه الإخوان وما أجملها نعمة..والحمد لله علي كده.وانا سعيد باللي ربنا إدهولي


لو أجتمعت أنت وحسنى مبارك فى غرفة واحدة هتقوله ايه؟

بصراحه كده أنا نفسي أخليه يديني ظهره وأرزعه أفه يرن يسمع مصر كلها

لو معاك مليون ونص هتعمل بيهم ايه؟
حتجوز بيهم في الوقت الحالي ..عشان مضمنشي أعمل مشروع ويصادروا أموالي قبل ما أتجوز.

بتحب مصر؟

ولله الحمد عندي شعور إن مفيش حد بيحبها أكتر مني ..بس أكيد فيه وإلا مكنش ده بقي حالي

بتحب البنات؟
أيوه طبعا.. أوعوا حد يفهمني غلط...ماهو بردوا أمي منهم وأختي اللي بموووت فيها والسيده خديجه وأمهات المؤمنين...طيب بالله عليكو حد سمع قبل كده عن بهبهات المؤمنين...ولا ايه رأيكو
وبعدين من الاخر كده محدش فينا يقدر يعيش من غيرهم ...ولا ايه يا رجاله؟؟؟؟

ليه؟
أظن الإجابه الأولي وضحت الإجابه التانيه

أيه اكتر موقف محرج أتعرضت ليه؟
بصراحه لما جتلي واحده في الجامعه وقالتلي إنها بتحبني..أوعوا حد يفهمني غلط

اتصرفت ازاى؟
بصراحه كنت في نص هدومي وخصوصا إن انا كليتي في الصعيد في قنا ومكنتش فاكر إن ممكن تحصل حاجه زي دي ..المهم عملت إن في واحد بينده عليا وونا ماشي قلتلها ميصحش كدهومعلشي أصل في واحد بينده عليا
أيه الامنية اللى بتدعى ربنا انه يحققها ليك؟
بصراحه نفسي في حاجات كتييير
1-نفسي أفتح إيطاليا أو علي الأقل يكون ليه دور
2-نفسي أتجوز واحده ملتزمه أمي تكون بتحبها وهي بتحب أمي
3-نفسي أجوز أختي جوازه محصلتشي فيكي يا إسكندرية
شكرا علي التاج الجميل ده وعلي العموم أنا محبتشي أهزر كتير في التاج ده وخصوصا إني أيام إمتحانات ومزاجي مش عالي وياريت يا اخونا تدعولي بقلبكو مش بكرشكو أصدي لسانكو بس يعني
ودلوقتي أمرر التاج وفووووووووووووووووووووووووووووو
الأخ محمد العناني
الأخ جمعاوي روش طحن
مدونه كيفي كده
الأخ زياد الفاتح
مدونه مش حاسكت
الأخ ميت
عاشقه الوطن
إمرأه تقول الذي لا يقال

حلم الحرية...الجزء الأول










في البدايه إسمحولي إن يكون عنوان المقال الجديد هو حلم الحريه وهو أسم مدونه الاخت مروه من إخوان إسكندريه ربنا يعزها ويكرمها يارب لكن علي العموم في شويه أحلام كلنا بنحلم بيها نفسنا تكون في بلدنا والحلم النهارده بكره حيبقي حقيقه ..زي اللي كان وهم وأصبح النهارده حقيقه وأنا شايف إن مقوله أحد الأئمه اللي قال ((أحلام الام حقائق اليوم وأحلم اليوم حقائق الغد ))وعشان كده إحنا لازم نحلم وخدوا بالكو الحلم اللي حنحلمه لازم نحلم بيه عشان نحققه مش عشان نطلع الكبت مثلا أو عشان أحقق أمنياتي في أحلامي لاني مش عارف أحققها مثلا ..وعلي العموم الاستاذ الشاعر العظيم المعاصر ((وليد الرفشي ))كتب ملحمة إسمها أحلام الشباب ننفرد ولله الحمد مدونه دينامو الإخوان بنشرها وهي أربع أجزاء الجزء الاول النهارده إن شاء الله ...وإسنوني التلات أجزاء التانيين إن شاء الله عن قريب.......وخلاص علي كده


ملحمة أحلام الشباب (الجزء الأول)1


أمنيتي أن أنطلق

وأقول ها أنا أعتنق

فكر السويه والشمول فالدين ديني كل ولا لن ينفلق


أطير فوق أغصاني

أحلق فوق أشجاري

دون نسر يطاردني

ولا نظرات ثعبان

وفجأه... أسمع صوتا.. صوتا منكر


صوت الحال المؤسف يأمر

ألا نحلم أو نتصور... وارتع الصوت وقال وردد

أنت في صحراء فأحذر .. أن تحلم بالون الاخضر..
فإخضع
وأركع
وأسكن قوقع



واعلم انك رغم شديد الجبن مقصر



فاسحب فوق القوقع برقع ثم تقهقر تحيا حياه الشعب المجبر ..فقلت لا


أنا لا أعيش حياه ذل وإنكسار.. فهي رساله ..تبغي رجالا

يفكرون

ويحلمون

ويطرقون فجر النهار

وأرددها وسأعليها

أنا حر برغم الظلم والأسوار
أنا حر برغم القهر والإعصار
أنا حر إذا فرض الحصار
أنا حر لأني إن أكن عبدا ..فربي واحد قهار

أيها الإخوه الأحباب أقول لكم في نهاية الكلام الحريه التي نحلم بها تنتزع ولا توهب وأذكركم ..من نذر نفسه ليعيش لدينه عاش متعبا ولكنه يعيش عظيما ويموت عظيما...وفي النهايه أدعو الله لنا جميعا ..وأسألكم الدعاء وأهدي الشكر الخاص لصاحب الشعر الجميل الأستاذ السكندري وليد الرفشي

تــــــــــــــــــاج رقم إتنين وربنا يستر





الحمد لله في تيجان بتجيلي أهي والتاج ده من الاخ محمد العناني وربنا يسامحه علي الجريمه اللي عملها فيه ...وعلي العموم أنا حجاوب وأمري لله وللأسف مش حأدر أكدب وربنا يستر...مممممممممممم





هل كنت طالب شاطر فى المدرسه ؟


ممممممممم......سؤال وجيه من واحد وجيه بصراحه يا أستاذ عناني في الابتدائي ممكن كنت شاطر وإظاهر كده إني كل مكبر ..مشاكلي تزيد ...أصدي مشاغلي تزيد ...أصدي فكري بيوسع......بخيب إستريحت يا عمي ...وربنا يسامحك ..وعلي العموم انا في كليه تجاره في قنا ومحول من أداب إسكندريه يعني مش وحش أوي بردو...وحش يا عمي إستريحت





ايه اكتر ماده حبيتها واكتر ماده كرهتها فى المدرسه والجامعه ؟


أكتر ماده كنت بحبها وخصوصا في الابتدائي ممكن العلوم ..أصدي الدراسات ..طيب الانجليزي ..طيب حتي العربي...الألعاب يا عمي إستريحت..وربنا يسامحنا كلنا ..ههههههه..عيال بقي



لكن أكتر ماده كرهتها بقي ........بصراحه مش فاكر لكن اللي فاكرو بجد إني كنت بكره أوي المواد كلها أما وانا في الجامعه بكره الاقتصاد لأن الدكتوور وحش جدا في تقديراته وتعاملاته مع الطلبه...ولا انتو ايه رأيكو....؟




كنت عايز تطلع ايه وانت صغير ؟



بصراحه وانا صغير في إبتدائي ومن الاخر عشان إظاهر كده إني مفضوح مفضوح كنت عايز أطلع جـــزار ..ومحدش يعلق لو سمحتوا المهم لما كبرت شويه كنت عايز أخلص دراستي بسرعه عشان أطلع فني مصاعد عشان كنت عايز أسافر أشتغل في إيطاليا ...أهو ويمكن أفتحها ...لكن دلوقتي عايز أخلص دراستي وأطلع داعيه مثلا مش مهم داعيه صريح زي الشيخ وجدي أو الشيخ محمد حسان ..مكن إعلامي أو ممثل ...أو.. أو.. أ,...إلخ















بصراحه كده علي قد ما انا كنت فرحان إن التاج وصل علي قد ما انا محرج جدا وخصوصا إن مكنش ينفع أكدب ودلوقتي أقدر أمرر التاج ...وفوووووووووووووووووو



يالا منطقااااااا

انا جدع !!؟

أنا جدع !!؟

أهلا بيكم في جامعة عمالية لاند ...

من غير مقدمات كتير ..ومن غير رغي كتير ..

هاجيبلكوا من الآخر ..

الفصل الأول
(اللوحة)

طلاب الإخوان في جامعة عمالية كانوا عايزين يعلقوا لوحات ..

حلو الكلام !!؟

محدش يسألني ليه بقى ..

الناس دي عندها رسالة وأنا باحترمها ..

وبعدين دي حرية يعني ..

وقبل ما حد يقولي الحرية تمارس في إطار القانون أقوله روح شوف أول 10 جامعات في العالم .. ده لو كنت تسمع عن حاجه اسمها "يال" أو "أوكسفورد" أو "هاريسبيرج" ..

وبعدين احنا متفقين مع بعض ان احنا جامعتنا بتتقدم .. بعد ماكنا في المركز ال 563 بقينا في المركز 523 وده تقدم رهيب ..

المهم بعيدا عن هذه المهاترات والفلسفات اللي مش هتودي ولا تجيب خليني أحكيلكم عاللي حصل في جامعة عمالية ...

راحوا الشباب دول يمشوا في السكة الرسمية لأي نشاط طلابي .. بعد طبعا ما الاتحادات اتزورت ومالاقوش منفذ رسمي لنشاطهم ..

طلعوا للعميد ..

شكرهم العميد ..

قالهم انتوا ايجابيين جدا على فكرة وانا باشجع نشاطكوا ..

وهامضي على لوحاتكم عشان تتعلق ..

لا .. ومش بس كده !!؟

ده أنا أزودهالكم !!؟

أمال إيييه !!؟

أنا باشجع النشاط الطلابي يا ولاد ..

سيبوا اللوحات دي عندي وهامضيهالكوا وأجيبهالكوا ..

ياسلام

اتفضلوا ياولاد

الفصل الثاني (التحول)

حد شاف فيلم من أفلام المتحولين أو المذؤبين على غرار American Werwolf أو Wolf بتاع المبدع Jack Nicholson ؟؟

أهو اللي حصل زي كده !!؟

حد يقولي ازاي !!؟

الطلبة طلعوا للعميد تاني عشان ياخدوا اللوحات ..؟

فإذا بالعميد بينظر لهم شذرا !!؟

الطلبة استغربوا !!؟

اللوحات دي مش هتتعلق !!

الطلبة بصوا حواليهم يمكن العميد بيشوف ناس همه مش بيشوفوهم ..

أنا بكلمكوا انتوا ..

يافندم احنا نفس الطلاب اللي كانوا هنا من شوية وحضرتك قلتلنا انك هتمضي عليها وتتعلق ..

لا لا لا لا لا لا ... الكلام ده مش هيتم ..

ليه بس حضرتك ؟

اللوحات دي دخلت بطريق غير مشروع .. ولن تعلق .. وأنا هاحاسب اللي واقفين عالبوابات .. وهاحاسبهم كوووولهم !!!

طبعا الطلبة اتصدموا ..

قالولوه هات اللوحات طب وبلاش تمضي عليها ..

المهم قالهم ابقوا تعالوا خدوها بعدين ..

طبعا الطلبة سمعوا كلام سيادة العميد ونزلوا ..


الفصل الثالث
(العملية في النملية)


كمان كام يوم جاء أحد العمال وطلب طلاب الاخوان يروحوا يستلموا اللوحات من عند قائد الحرس ..

راحوا ..

لقوا قائد الحرس بيفتعل مشادة كلامية معاهم ويقولهم حاجات عجيبة محدش عارف قال ايه بالضبط بس كان في صوت عالي في المكان و لعاب بيتطاير ..

المهم قائد الحرس قال الكلمتين اللي عندوا ومشي ..

هنا بقى جا عم الغفير احد عمال الأمن وحب يظهر شوية قدام الظابط ويرقيه شيخ غفر ولا حاجه عشان دي أمنيته من أيام الطفوله لما أبوه جابله سخان شاي ومن يومها بيحلم بالبندقه والسخان ومين هناك !!؟

عمل إيه بقى صاحبنا !!؟

افتكر نفسه بيتخانق في الشارع ..

اطلعلي بره ياض منك له ...

راجل فيكوا يطلعلي بره ..

أنا هابهدلكوا بره ..

ده انا هاربيكوا ياولاد دين ***** !!!!!!!!!؟

وبدأ وشه يتنفخ ويظهر على جسمه تغيرات فسيلوجية

واضح طبعا ان الشخص منهزم داخليا وبيعاني من الوحدة أو إنعدام الحنان لما كان صغير ..

أنا يا جماعه مش دكتور نفسي بس باشوف Dr.Phill كتير وباحب أعيش الدور شوية ..


الفصل الرابع
(الهياس المريع)

راحوا بقى تاني يوم لقوا حاجات غريبة ..؟

الطالب : إسلام علي سليم تم تحويلة للتحقيق !!!!!؟

ولمدة 3 اسابيع !!!؟

أصله هو اللي سب الدين وقال للطلبة اطلعولي بره لو رجاله !!؟

هو اللي ضحك على الطلبة واتحول عليهم !!!؟





إديني عقلك



ومش بس كده ...

ولكن ..

إنتظر !!

فالعرض المقدم من إدارة الجامعة العمالية لم ينتهي بعد ..

فبالإضافه لكل ده الباشا مدير الجامعة العمالية عايزهم يعتذروا للضابط !!!!!؟

هو حد طفى المروحة ولا أنا مخنوق شوية !!!؟


(هذا البوست نقلا عن جامعة أون لاين)

شكر خاص لكريم عيسي

حكايه الناس دوك هم


حنسمي في الاول بسم الله الرحم الرحيم وكمان حنصلي علي الحبيب اللهم صلي علي النبي المختار وسمعونا الصلاه علي النبي انتو كمان ... اه صحيح انتو بتقرأوا.... لامؤاخذه..علي العموم القصه هيه هيه وكل يوم نحكيها ونحكي فيها قصه الناس دوك هم بتوع المرشد دوك هو اللي اتربي علي ايد الامام دوك هو صاحب رساله ال...بتاع ده ..علي العموم كلنا عارفين الضجه الكبيره المعموله إعلاميا علي دوك هم عشان دوك هم بأوا يظهروا كتير وكلامهم كتر علي دوك هو وقال ايه رافضين دوك هو صاحب الكرسي بتاع دوك هو يسلم يعدل ايه الدستور وقال ايه دوك هم عارفين إن دوك هو عايز دوك هو يقعد علي الكرسي بعد دوك هو .وقال ايه دوك هو بيضرب في دوك هم علشان دوك هم رافضين دوك هو يستلم اللعبه بعد دوك هو ..أنا عايز أقول إن اللي أسمه ايه لازم يعرف إن اللي اسمه ايه بتاع اللي أسمهم ايه مش راح يسكت علي دوك هو عشان دوك هو اللي اسمه ايه بيعمل لله مش للي اسمه ايه ولا اسمه زي اللي اسمه ايه اللي سكت علي كلام اللي اسمه ايه علشان اللي اسمه ايه عطاه شويه بتاع للبتاع يعمل بيهم بتاع عشان مصلحه البتاع وطلع والله بتاع والبتاع التاني اللي اللي مرداش بالبتاع عشان خاطر هو مش عايز بتاع ده عايز شويه بتاع عشان خاطر شويه بتاتيع للبتوع بدل البتاع البتاع بتاع البتاع وأنا مش عارف ايه اللي حصل في البتاع عشان يبقي طماع كده وقال ايه كل ده عشان شويه بتاع مش عارف ان البلد باظت من كتر البتوع اللي بيبيعوا البتاع عشان خاطر بتاع او شويه بتوع وان البتوع دول اخرتهم وحشه لانهم باعو البتاع بتاعهم(الضمير )عشان شويه بتاع والله البتاع ده معندوش أصلا بتاع (ضمير )يحس بيه ...لكن بقي الناس اللي عندهم بتاع ومفرطوش في البتاع ما انتو عارفين دول النادس دوك هم اللي مفرطوش في البتاع( الضمير ) علشان دوك ةهمه بيعملو لله مش للبتاع وكفايه بتاع خليتو البتاع دوك هو يتنمرد علشان لقي دوك هم فرطوا في البتاع وسابوا دوك هم لوحديهم فضرب دوك هو في دوك هم ومهموش دوك هم عشان دوك هم بقو لوحديهم واحنا لازم نصحي ونصحي الناس دوك هم عشان دوك هم ميتنمردوش وتبقي البلد بعد كده بتاع جميل كده شبه البتاع الجامد ده ولا فيش دوك هم ولا دوك هم ولا فيش دوك هو يطلع يعمل تاني زي دوك هو ولا انتو معايا ولا معاه دوك هو