لسان حالي يردد


بصراحه الواحد مش عارف يعمل ايه في اليوم الواحدج لكن اليوم أنا بصدد (أيام من حياتي)للكاتب المدون ياسر مدني.....يلا نخش في الموضوع ومن غير مقدمات..؟

المشهد الأول(محطه القطار)؟

كنت في ااقاهره ..جاي من المنصوره ورايح الصعيد ومستني القطر والناس بصراحه كتيييييييييييييييييييير ...لا والله ده كتيييييييييييييييييير جـــدا جـــدا جــدا ..ولما دخل القطر وكله بيجري عشان يلحق القطار وأول ما دخل القطر المحطه...الناس وقفت..وانا كمان وقفت أصل القطر كان مليان علي الآخر ...وبصراحه هو كان جاي م المخزن مليان ...أمال الناس اللي في المحطه دول مش الناس اللي مسافره بردوا ولا ايه ...طيب والناس اللي في القطر دول جايين منين ... أمال ايه وفين ومنين ..طيب حتي مفيش مكان نقف فيه ..أمال ايه وحنعمل ايه وحنروح إزاي وكل الناس دي رايحه فين واللي مش عارف يركب حيعمل ايه هاه وبعدين ..طيب والستات والناس الكبيره وكل ده ...والعمل يا جماعه....فلم أجد سوي لسان حالي وهو يردد
حسبي الله ونعم الوكيل

المشهد الثاني(فرن العيش)؟

بما إني عايش في قنا مع شويه طلبه فحنا بنخدم نفسينا بنفسينا ولما جه اليوم اللي أنا حجيب فيه العيش ...رحت فرن ملايين
التاني ...ملاييين

التالت شطب الرابع ...بردو شطب ...شطب الأمر لله أرجع أقف في الأول أو التاني عشان أجيب عيش وخلاص

للأسف شطب شطب
هاه الحمد لله إفتكرت في فرن في وسط البلد بيتأخر ...الحمد لله شغال ...زحمه زحمه مش مشكله المهم ناكل والأمر لله الطاور كلها ساعتين تلاته ونوصل لآخر الطابور ونجيب العيش وبعديها إن شاء الله حروح سالم غانم وحنأكل الناس...المهم الساعه كام دلوقتي إتناشر .....وربع ....ونص ......لسه مزهأتش وربنا مصبرني وواقف في الطابور.....الساعه واحده...وربع ...ونص ...يلا يا جماعه شطبنا مفيش عيش تاني

يالهويييييييييييييييييييييييييييييييييييييييييييييي

يا نهار ابيض بعد كل ده
مكانش في ايدي حاجه غير إني أجد لسان حالي يردد

حسبي الله ونعم الوكيل


المشهد التالت(المواصلات)؟

إنهارده رايح الجامعه وعندي محاضرات كتيييييير وسكاشن من الساعه 8 لحد السعه إتنين محاضرات ...وبعد كده سكاشن ومفيش راحه إلا بعد كل محاضره أو سكشن شويه صغيرين ..المهم مروح بقي وبحلم بالسرير ..والأكل والراحه بعد العناء الطويل ده ...هه ...وطلعت من باب الجامعه....مواصلات ...إيه مفيش مواصلات ...لا حرام...علما بأن كليتي في قنا وهي محافظه مش زي إسكندريه لا تتميز بكثافه سكانيه عاليه..لا ده كتييييييييير ...حرااااااااااااااااااااااااااااااااااااام ...هه الحمد لله في عربيه جيه أهي ....طيب حتشيل مين ولا مين ...فلا أجد إلا لسن حالي يردد حسبي الله ونعم الوكيل



المشهد الرابع(الأمن )؟

يا صبحنا وصبح الملك لله ع الصبح رايح الجامعه وكالعاده الأمن عشان عارفني من الإخوان مش بيقولي هات الكارنيه...بس كان في واحد ماشي معايا إسمه إسماعيل..ألاقيه بيقولي بعد ما سبتني خدوا مني الكارنيه وبهدلوني وقالولي تعالي خد الكارنيه من قائد حرس الكليه....وبعد كده ألاقي الأمن بيجبر المنقبات علي رفعه ومن ترفض تحول شئون قانونيه...وبعد كده أخرج أروح أصلي كل من له لحيه ...هات البطاقه وروح خدها من أمن الدوله ...وهناك هات يا قله أدب....وبعدين هم واخدين راحتهم ليه طيب ما البنت دخلت الجامعه بلبس مسخره ولما راحوا لرئيس الجامعه بهدلهم ...إحنا اللي بنتبهدل وهم الساده واحنا العبيد لا مش ممكن ده كتيييييييييييييييييير


فلم أجد سوي لسان حالي يردد حسبي الله ونعم الوكيل
إخوني المشاهد تستمر والفضايح أكتر والموضوع كبير كبير ...وإستنوا مني باقي المشاهد لأني تعبت بصراحه ولكن حنكمل


وحسبي الله ونعم الوكيل

15 comments:

عصفور المدينة said...

حسبنا الله ونعم الوكيل
أعانكم الله

ammola said...

اخى بالنسبة لمشكلة الخبز ليه ما تجيبوش كمية كبيرة وتشيلوها فى الفريزر بدلا من تضييع الوقت فى الفرن
ربنا معاكم ويهون عليكم

ياسر مدني ...دينامو الإخوان said...

الأخت أمولا
جزاك الله خير علي الإضافه العظيمه دي
بس أنا عايز أقول إن مش هي دي المشكله إحنا بنتصرف لكن المشكله في الظاهره نفسها


الأخ عصفور
جزاك الله خير علي المشاركه

ammola said...

الاخ ياسر
انا عارفة طبعا انك بالاساس بتتكلم عن مشاكل هامة فى البوست وده اللى كان مقصود منه
بس طبع المرأة غلبنى
:)

ابو صهيب ( الجمعاوي الاصيل)سابقاً said...

هكذا الحال في بلادنا
حسبنا الله ونعم الوكيل
البوست الاخير لي
انجازات السيد نظيف

عبد الرحمن مدني said...

واضح جدا يا ياسر ان الموصلات فاضيه اويىىىي
وان العيش بيترمه من كتره
الله يرحم ايام مكان بياكلو الطيور على الجبال

مؤمنه said...

السلام عليكم ورحمة الله وبركاته
أليس الصبح بقريب
والسلام عليكم ورحمة الله وبركاته

Unknown said...

والله يااستاذي لايغير الله مابقوم حتي يغيروا مابأنفسهم يعني لازم الناس تنتفض لو عايزه تعيش كويس والمشاهد اكتر من ان تحصي وربنا يبارك فيك وجزاك الله خير

ابوزياد الفاتح said...

جيت على الجرح يا عم ياسر
هاقول ايه بس
لا يغير الله ما بقوم حتى يغيروا ما بانفسهم
حتى الدعاء شكله مش مقبول
لاننا كلنا ذنوب ياعم
بس هنعمل ايه
ربنا اعلم بالحال برضه
وحسبنا الله ونعم الوكيل
اكتر حاجه بتتعبنى انا
حكاية عيش الفرن دى
حرس على جيوبك يا معلم

عبد الرحمن مدني said...

انت يا عم


عايزين نشوف جديد وخليك معايا فالمدونه شويه

عبد الرحمن مدني said...

انا عملتلك بنر ب1000000 جنيه ولى انته حتعد امته وانا ابعتهولك

ياسر مدني ...دينامو الإخوان said...

إيه يا عم عبده الجرس دي وعلي العموم إبعتهولي علي الإيميل وأنا حشوفه

Anonymous said...

أسلوبك حلو أخي الكريم المضحك المبكي

أنصحك بكتابة إسكتشات

Anonymous said...

بسم الله الرحمن الرحيم
ربنا معاك والله لا املك لك سوى الدعاء وربنا يرحمك ويرحمنا ويرحم بلدنا من اللى احنا فيه وربنا يكرمك ويجعل التغيير على ايدك

عاشــــــ النقاب ـقــــة"نونو" said...

اول زيارة باذن الله مش الاخيرة
ربنا معاكم ويثبتكم يا شباب يفرح ان لسة فيه زيكوا
دمت بخير اخي