يالا منطقااااااا

انا جدع !!؟

أنا جدع !!؟

أهلا بيكم في جامعة عمالية لاند ...

من غير مقدمات كتير ..ومن غير رغي كتير ..

هاجيبلكوا من الآخر ..

الفصل الأول
(اللوحة)

طلاب الإخوان في جامعة عمالية كانوا عايزين يعلقوا لوحات ..

حلو الكلام !!؟

محدش يسألني ليه بقى ..

الناس دي عندها رسالة وأنا باحترمها ..

وبعدين دي حرية يعني ..

وقبل ما حد يقولي الحرية تمارس في إطار القانون أقوله روح شوف أول 10 جامعات في العالم .. ده لو كنت تسمع عن حاجه اسمها "يال" أو "أوكسفورد" أو "هاريسبيرج" ..

وبعدين احنا متفقين مع بعض ان احنا جامعتنا بتتقدم .. بعد ماكنا في المركز ال 563 بقينا في المركز 523 وده تقدم رهيب ..

المهم بعيدا عن هذه المهاترات والفلسفات اللي مش هتودي ولا تجيب خليني أحكيلكم عاللي حصل في جامعة عمالية ...

راحوا الشباب دول يمشوا في السكة الرسمية لأي نشاط طلابي .. بعد طبعا ما الاتحادات اتزورت ومالاقوش منفذ رسمي لنشاطهم ..

طلعوا للعميد ..

شكرهم العميد ..

قالهم انتوا ايجابيين جدا على فكرة وانا باشجع نشاطكوا ..

وهامضي على لوحاتكم عشان تتعلق ..

لا .. ومش بس كده !!؟

ده أنا أزودهالكم !!؟

أمال إيييه !!؟

أنا باشجع النشاط الطلابي يا ولاد ..

سيبوا اللوحات دي عندي وهامضيهالكوا وأجيبهالكوا ..

ياسلام

اتفضلوا ياولاد

الفصل الثاني (التحول)

حد شاف فيلم من أفلام المتحولين أو المذؤبين على غرار American Werwolf أو Wolf بتاع المبدع Jack Nicholson ؟؟

أهو اللي حصل زي كده !!؟

حد يقولي ازاي !!؟

الطلبة طلعوا للعميد تاني عشان ياخدوا اللوحات ..؟

فإذا بالعميد بينظر لهم شذرا !!؟

الطلبة استغربوا !!؟

اللوحات دي مش هتتعلق !!

الطلبة بصوا حواليهم يمكن العميد بيشوف ناس همه مش بيشوفوهم ..

أنا بكلمكوا انتوا ..

يافندم احنا نفس الطلاب اللي كانوا هنا من شوية وحضرتك قلتلنا انك هتمضي عليها وتتعلق ..

لا لا لا لا لا لا ... الكلام ده مش هيتم ..

ليه بس حضرتك ؟

اللوحات دي دخلت بطريق غير مشروع .. ولن تعلق .. وأنا هاحاسب اللي واقفين عالبوابات .. وهاحاسبهم كوووولهم !!!

طبعا الطلبة اتصدموا ..

قالولوه هات اللوحات طب وبلاش تمضي عليها ..

المهم قالهم ابقوا تعالوا خدوها بعدين ..

طبعا الطلبة سمعوا كلام سيادة العميد ونزلوا ..


الفصل الثالث
(العملية في النملية)


كمان كام يوم جاء أحد العمال وطلب طلاب الاخوان يروحوا يستلموا اللوحات من عند قائد الحرس ..

راحوا ..

لقوا قائد الحرس بيفتعل مشادة كلامية معاهم ويقولهم حاجات عجيبة محدش عارف قال ايه بالضبط بس كان في صوت عالي في المكان و لعاب بيتطاير ..

المهم قائد الحرس قال الكلمتين اللي عندوا ومشي ..

هنا بقى جا عم الغفير احد عمال الأمن وحب يظهر شوية قدام الظابط ويرقيه شيخ غفر ولا حاجه عشان دي أمنيته من أيام الطفوله لما أبوه جابله سخان شاي ومن يومها بيحلم بالبندقه والسخان ومين هناك !!؟

عمل إيه بقى صاحبنا !!؟

افتكر نفسه بيتخانق في الشارع ..

اطلعلي بره ياض منك له ...

راجل فيكوا يطلعلي بره ..

أنا هابهدلكوا بره ..

ده انا هاربيكوا ياولاد دين ***** !!!!!!!!!؟

وبدأ وشه يتنفخ ويظهر على جسمه تغيرات فسيلوجية

واضح طبعا ان الشخص منهزم داخليا وبيعاني من الوحدة أو إنعدام الحنان لما كان صغير ..

أنا يا جماعه مش دكتور نفسي بس باشوف Dr.Phill كتير وباحب أعيش الدور شوية ..


الفصل الرابع
(الهياس المريع)

راحوا بقى تاني يوم لقوا حاجات غريبة ..؟

الطالب : إسلام علي سليم تم تحويلة للتحقيق !!!!!؟

ولمدة 3 اسابيع !!!؟

أصله هو اللي سب الدين وقال للطلبة اطلعولي بره لو رجاله !!؟

هو اللي ضحك على الطلبة واتحول عليهم !!!؟





إديني عقلك



ومش بس كده ...

ولكن ..

إنتظر !!

فالعرض المقدم من إدارة الجامعة العمالية لم ينتهي بعد ..

فبالإضافه لكل ده الباشا مدير الجامعة العمالية عايزهم يعتذروا للضابط !!!!!؟

هو حد طفى المروحة ولا أنا مخنوق شوية !!!؟


(هذا البوست نقلا عن جامعة أون لاين)

شكر خاص لكريم عيسي

14 comments:

Anonymous said...

مش هقدر اقول لك حاجه علي البوست ده لانه كوبي كنت اتمني انك تعلق عليه علشان نعرف رايك فيه سلام
هادي خشبه

Anonymous said...

انا نفسي اعرف هل هذه الجامعة فرع القاهرة هوه ده سوال هام جدا بالنسبة لي

ياسر مدني ...دينامو الإخوان said...

بصراحة أنا رأيي في معروف لأني حطيته في المدونه ...ولا انت ايه رأيك ؟؟؟وجزاك الله خيرا علي التعليق يا أستاذ هدي


أما عن أستاذ البتول فأنا أقد أقولك رغم إن الموضوع مش موضوعنا ومش حيفيدنا ..لكن هي فرع من جامعه اسكندريه

Anonymous said...

لا طبعا
انت مويد بس لازم تعلق انت رافض بس لازم تعلق يعني تفتح ماده للتحاور ده راي وله ده موقع مش مدونه المدونه افكار تتحاور انا هتحاور معاك في ايه شكرا يا ياسر واتمني متتاخرش في الرد اوي كده
سلام

ياسر مدني ...دينامو الإخوان said...

أنا متشكر جدا يا استاذ هادي ومش حتأخر غليك إن شاء الله ..وعلي العموم أنا رأيي ان احنا بقينا في وضع حرج ... واتحولنا زي العميد كده بس من فقر الثققافه الي تقافه الفقر وده بسبب ايه انا مش عارف لكن اللي خلاني اقول كده ان لو الناس كلها قالت لأ وأصرت متخافشي ولا تتكسف ولا فيش كب دماغك ولا فيش خليك جنب الحيط ولا فيش وانا مالي ...مش حتلاقي النظام يقد
ر يقف أصاد الشغب مش فئه واحده من الشغب ولا انت ايه رأيك؟؟؟

Anonymous said...

انت شايف ان الموضوع في ايجابيه بس ؟؟؟؟
والجاني الثقافي تمام ؟؟؟؟والجانب الاخلاقي تمام ؟؟؟؟ وان الشعب يستحق هذه الحريه ؟؟؟
انا معاك ان الموضوع ملوش دعوه بالحريه يعني المفروض الحريه موجود والناس مش بتخاف لكن مش ديه المشكله الوحيده وله ايه ؟؟؟؟؟؟؟؟؟؟؟؟
اتمني اسمع رايك

حلم الحرية said...

يعني نستاذن مش عاجب ندخل الحاجات من وراهم مش عاجب
امال نعمل ايه

حلو الموضوع يا ياسر ولو اني بافضل ان التدوينات تبقي كتابة وخواطر لصاحبها

محمد عـنـانـى said...

بص يا ياسر
ربنا يوفقكم وينصر دعوتنا

محمد عـنـانـى said...

ليك تاج عندى
ولو مجوبتش عليه انت عارف انا هعمل فيك ايه

ياسر مدني ...دينامو الإخوان said...

شكرا لكل اللي عبرني وكتب تعليق عندي وعلي العموم....بصو حقولكو ايه.

الاستاذ الفاضل هادي خشبه
شكرا علي تعليقك بس انا عايز أقولك ان الموضوع في نظري موضوع أولويات يعني مثلا لو واحد مش بيصلي وبيشرب سجاير وفيه وعليه كتييييير معقول حتروح تقوله ربي دقتك ...أظن كلامي مفهوم ولا ايه...؟؟؟


الاستاذه مروه شكرا علي النصيحه الجميله اللي علي الملا الي خلتني في وسط هدومي ...بس مش أوي يعني ..عايز أقول اولا أنا وجامعه أون لاين أصحاب رساله واحده ولا ايه ...وبعدين ما انا كتبت انها من جامعه أون لاين وبعدين ما انا عملت معاهم واجب وحطيت الموقع بتاعهم عندي يعني دعايه بردو ...ولا ايه...؟


الاستاذ العناني حااااااااااضر حادخل علي مدونتك واجاوب علي التاج وشكرا لإهتمامك بيه؟؟؟

Anonymous said...

لالالالالالالالالالالا نت فهمتني غلط اقرا الكلام تاني انا مش قصدي جانب فقهي انا اتحدث عن ثقافه مجتمع
اتكلم عن احوال اجتماعيه
اتكلم عن مفهيم مغلوطه
اتكلم عن اوضاع خط من الشعب
انا عايز اقول ان الايجابيه موجود ولكن ليست هيه المشكله الوحيده ذي م انت قولت انا اقول انها مش مشكله ديه كارثه ولكنها ليست الوحيده فهمني يا يا ياسر بيه
سلام نفســــــــــــــــــــي ترد عليه بسرـــــــــــــــــــــــــــــعه

ياسر مدني ...دينامو الإخوان said...

أنا مش فاهمك والله يا أستاذ هادي لكن علي العموم مش حنختلف ولا ايــــــــــــه؟؟

Anonymous said...

لاعادي مفيش مشكله والموضوع هيتفتح تاني اكيد
سلام

أخـــ مسلمة ـــت said...

موضوع الاعلان بتاع منع تعليق اللوحات بيتعمل عندنا كل اول ترم

و ينزلولنا عمو بتاع رعاية الشباب يقعد يقولنا دي بلد بايظة وانا عبد المامور ( اعوذ بالله ) ولو انتو مش خايفين انا خايف وخزعبلات غريبة كده لما حفظنا اسطوانته المشروخة و بقينا نسمعهاله احنا بعد كده

والاعلان ينزل

واحنا نعلق اوحاتنا جنبه عادي جدا

مش عارفة كل كام اخت ياخدوا مجالس تاديب و بتعدي

طنش تعيش يتحصل كتير و اللي بيدقق بيتعب

-------

بوست جميل جدا

جزاكم الله خيرا