اعطني حريتي أطلق يدي ...ولا أقولك


اعتقلوني اعملوا معروف
اعتقلوني يومين لله
اعتقلوني عاوز أنام
والله بنام بأمانة حداكم
والله في بيتنا ما بعرف أنام
طول الليل أنا باستناكم
فاكر مرة رحت أنا نمت
قامت جارة ضربت جوزها
صرخ الراجل بالحيَّاني
حصلت دبكة وهيصة كمان
قلت دا والله جم ياخدوني
وأما عرفت حكاية جارنا
قلت يا شيخ منك لله
هوَّ أنا ناقصك أنت وهُمَّا
طول الليل ظليت أنا صاحي
الصبحية خرجت الشارع
شمال ويمين عمال باترنَّح
رُحت الشغل الناس بصولي
قالوا حكايتك تطلع إيه
قلت يا ناس من الخوف باتقطَّع
ولما حكيت للناس مشكلتي
قالوا يا راجل سلِّم نفسك
نام لك قد يومين في الحبسة
ريَّح نفسك بعدين إطلع
أحسن ضغطك بعدين يرفع
ولاَّ تجيلك جلطة كمان
واللا السكر ينزل يطلع
روح ويَّاهم تبقى تمام
اعتقلوني اعملوا معروف
اعتقلوني يومين لله
مرة قالوا لي اتلمّ احسن لك
تبقى النومة في بيتكوا تمام
قلت دي تهمة ولزقت فيَّ
ما بتطلع ولا بالزار
أهل الحتة يقولوا ده مجدع
واخِد باله من الجعانين
والمحتاجة والمظلومة والعَصيانة برّه البيت
عينه علينا زي والدنا ولاَّ أخونا م الأبوين
أمن الدولة قالوا إرهابي
ده بيتسلل للمساكين
بعد شوية هايجنَّدكم
وهايبعتكم لفلسطين
ولاَّ مليشيا في الجامعات
عند المرشد تدُّوا البيعة
ماسكين مصحف ويَّا سيفين
عندها نيجي بالقوات
ناخد أهلك واللي جابوك
ونوديكم ع المحكوم
ويَّا عطية عم كمال
والمساجين إياهم دوله
حوكشة وبشلة وشغته كمان
وابقى قابلني إن شمسك طلعت
ولاَّ حبايبك عرفوا مكانك
م المحكوم ع المزرعة تمشي
ولاَّ نودِّيك ع النطرون
ولاَّ عساكر تحكم فيكم
خد لك فيها سنة وسنتين
بس الناس علشان عارفاني
قالوا معاكوا ف أي مكان
لا يهمنا مزرعة ولا غيره
ولا محكوم ولا وادي نطرون
إحنا معاكوا لحدّ الجنة
نلقى فيها سحرة فرعون
وف جنة رضوان نتنعَّم
عند نبينا والشيخين
واللي في ناحية لوحده.. يفرقع
ولا إبليس ولا غيره هينفع
كله ساعتها في الرجلين
يبقوا يقولوا خلاص حرَّمنا
ولاَّ يقولوا يا ريتنا بنرجع
وما نعملش عملنا الشّين
قال المولى ليهم (كلا)
فرصة وحيدة خلاص خدتُّوها
مالهاش ملحق ولا شافعِين


..شعر للمهندس محمود المرسي

5 comments:

محمد عـنـانـى said...

هههههههههههه
شعر رائع ولا احس شاعر
ايو عايز انام انا مستنى
هما فاكرين انهم بيحطمونا
احنا اصحاب دعوه يعنى فى السجن معنا فى البيت معان فى كل مكان معانا
ربما يقود السجن نصر على هولاء الحمقى
تحياتى ليك يا ياسر
وللبشمهندس محمود المرسى

// MahMouD & MosTafa // said...

والله أبيات فى الجووووووووووووون

يسلم اللسان اللى آل الكلام الجامد دا

بس دا كدة لو حسوا انه بيحب الكلام دا حيجيبوووووووه من أف اللى جابوه

تفضل بقبول وافر تحياتى

MahMouD


صاحب مدونة

!!هو فى ايه!!

http//www.wnated.blogspot.com

حلم الحرية said...

بوست في الجووووووووووووووووون

عجبتني اوي جملة
إحنا معاكوا لحدّ الجنة

ايوة لحد الجنة ان شاء الله

ما هو احنا اختارنا الطريق ده لانه طريق جهاد
طريق جنة

يعتقلوا...او يصادروا الاموال ..اويقفلوا شركات
مش حيهمنا
طالما في سكة ربنا
مش حيهمنا
حنصبر ونصبر ونصبر

احنا معاهم لحد الجنة

جميلة مدونتك يا ياسر مدني
يااللي من سيدي بشر
ياللي من الاخوان

محمد عـنـانـى said...

ليك تاج عندى

احنا هنا said...

شعر جمييييييييل